පහ ශ්‍රේණිය ශිෂ්‍යත්ව විභාගය ගැන විශේෂ නිවේදනයක් - ගුරුවරුන්ගේ හා දෙමව්පියන්ගේ අවදානයට

උපකාරක පන්ති සම්පූර්ණයෙන්ම තහනම්: 5 ශ්‍රේණිය ශිෂ්‍යත්ව විභාගය අගෝස්තු 9 වැනිදා – අගෝස්තු 5 සිට වහාම ක්‍රියාත්මක වන පරිදි දැඩි නීති

2026 වර්ෂයේ පැවැත්වෙන 5 ශ්‍රේණිය ශිෂ්‍යත්ව විභාගයට අදාළව, උපකාරක පන්ති, දේශන, සම්මන්ත්‍රණ සහ අනුමාන ප්‍රශ්න පත්‍ර බෙදා හැරීම එළඹෙන අගෝස්තු මස 05 වන දින මධ්‍යම රාත්‍රී 12.00 සිට විභාගය අවසන් වන තෙක් සම්පූර්ණයෙන්ම තහනම් කර ඇති බව විභාග දෙපාර්තමේන්තුව නිවේදනය කරයි.

මෙවර පහ ශ්‍රේණිය ශිෂ්‍යත්ව විභාගය අගෝස්තු මස 09 වන දින දිවයින පුරා විභාග මධ්‍යස්ථාන 2,723 කදී පැවැත්වීමට කටයුතු සංවිධානය කර ඇත. මෙම විභාගය රටේ සිසුන් ලක්ෂ ගණනකගේ අධ්‍යාපන අනාගතය තීරණය කරන තීරණාත්මක අවස්ථාවක් වන බැවින්, එහි සාධාරණත්වය සුරැකීම සඳහා දැඩි නීති ක්‍රියාත්මක කිරීමට බලධාරීන් පියවර ගෙන ඇත.

මොකක්ද තහනම් කර ඇත්තේ?

1968 අංක 25 දරණ ප්‍රසිද්ධ විභාග පනතේ නියෝග ප්‍රකාරව, අගෝස්තු 05 වන දින මධ්‍යම රාත්‍රියේ සිට පහත සඳහන් සියලු කටයුතු සපුරා තහනම් බව විභාග කොමසාරිස් ජනරාල්වරිය පවසයි.

1. උපකාරක පන්ති පැවැත්වීම සහ මෙහෙයවීම.

2. විෂයානුබද්ධ දේශන, සම්මන්ත්‍රණ සහ වැඩමුළු පැවැත්වීම.

3. අනුමාන ප්‍රශ්න ඇතුළත් ප්‍රශ්න පත්‍ර මුද්‍රණය කිරීම සහ බෙදා හැරීම.

4. විභාග ප්‍රශ්න හෝ ඒ හා සමාන ප්‍රශ්න ලබාදෙන බවට පෝස්ටර්, බැනර්, අත්පත්‍රිකා මෙන්ම විද්‍යුත්/මුද්‍රිත මාධ්‍ය හෝ සමාජ මාධ්‍ය මගින් ප්‍රසිද්ධ කිරීම සහ එවැනි දෑ ළඟ තබා ගැනීම.

නීතිය කඩ කළොත් දඬුවම්

විභාග කොමසාරිස් ජනරාල්වරිය වැඩිදුරටත් අවධාරණය කරන්නේ, මෙම නියෝග නොසලකා ක්‍රියා කරන ඕනෑම තැනැත්තෙකු, ආයතනයක් හෝ පාර්ශ්වයක් ප්‍රසිද්ධ විභාග පනත යටතේ වරදකරුවෙකු වන බවයි. එවැනි අයට එරෙහිව දැඩි නීතිමය පියවර ගැනීමට කටයුතු කෙරේ.

පැමිණිලි කරන්නේ මෙහෙමයි

නීති විරෝධී ලෙස උපකාරක පන්ති පැවැත්වීම, අනුමාන ප්‍රශ්න පත්‍ර බෙදා හැරීම හෝ ප්‍රචාරය කිරීම පිළිබඳ තොරතුරු ඇත්නම්, පහත දුරකථන අංක ඔස්සේ අදාළ බලධාරීන් වෙත දැනුම් දිය හැක.

· පොලිස් මූලස්ථානය: 011 2421111

· පොලිස් හදිසි ඇමතුම් අංකය: 119

· විභාග දෙපාර්තමේන්තු ක්ෂණික ඇමතුම් අංකය: 1911

· පාසල් විභාග සංවිධාන හා ප්‍රතිඵල ශාඛාව: 011 2784208 / 011 2784537

✅✅✅✅✅✅✅✅✅✅✅✅