ආපදාවට අසු වූ ජනතාවට උණුසුම් බත් පිඟානක්: නාවික හමුදාව ජංගම මුළුතැන්ගෙවල් 4ක් සූදානම් කරයි
පවතින අධික වර්ෂාව හා ගංවතුර ආපදා තත්ත්වයෙන් පීඩාවට පත් වූ ජනතාවට කඩිනමින් උණුසුම් ආහාර ලබා දීම සඳහා ශ්රී ලංකා නාවික හමුදාව විසින් ජංගම මුළුතැන්ගෙවල් (Mobile Kitchens) 4ක් සූදානම් කර තිබේ.
නිවාස අහිමි වී සහන කඳවුරුවල රැඳී සිටින හෝ ගංවතුරින් හුදකලා වූ ගම්මානවල සිටින ජනතාවට උණුසුම්, පෝෂ්යදායී ආහාර වේලක් ලබා දීම මෙම වැඩසටහනේ අරමුණයි. අවශ්යතාවය අනුව ක්ෂණිකව ක්රියාත්මක විය හැකි පරිදි, මෙම ජංගම මුළුතැන්ගෙවල් යෙදවීමට අවශ්ය සියලු උපකරණ, ඉන්ධන සහ ආහාර ද්රව්ය මේ වන විටත් සූදානම් කර ඇති බව නාවික හමුදා මාධ්ය ප්රකාශක කාර්යාලය සඳහන් කළේය.
ජනතා සුබසාධනයට කැපවීමක්
නාවික හමුදාව සිය නිවේදනයේ වැඩිදුරටත් සඳහන් කර ඇත්තේ, ආපදා අවස්ථාවලදී ජනතාවගේ ජීවිත ආරක්ෂාව හා සුබසාධනය වෙනුවෙන් අඛණ්ඩව සේවය කිරීමට තම හමුදාව කැපවී සිටින බවයි. ජීවිතාරක්ෂක මෙහෙයුම්වලට අමතරව, මෙවැනි මානුෂීය සහන මෙහෙයුම් දියත් කිරීම තුළින් විපතට පත් ජනතාවගේ දුක් ගැහැට අවම කිරීමට නාවික හමුදාව බලාපොරොත්තු වේ.
ගංවතුර බලපෑමට ලක් වූ ප්රදේශවල ප්රාදේශීය ලේකම් කාර්යාල සහ ආපදා කළමනාකරණ ඒකක සමඟ සම්බන්ධීකරණයෙන් මෙම ජංගම මුළුතැන්ගෙවල් අවශ්ය ස්ථානවලට යෙදවීමට නියමිතය.
✅✅✅✅✅✅✅✅✅✅✅✅
📢 Breaking News SMS Alerts
මොබිටෙල් පාවිච්චි කරන අයට විශ්වාසදායක පුවත් SMS සේවාව.
77000 ට SMS කරන්න
0 Comments