රුසියාවේ ඉදිකිරීම් රැකියා ශ්රී ලාංකිකයන්ට විවෘත වෙයි: NOSTROY සංගමය සමඟ ඓතිහාසික ගිවිසුමක් අත්සන් කෙරේ
ශ්රී ලාංකික සේවකයන්ට රුසියානු සමූහාණ්ඩුවේ ඉදිකිරීම් ක්ෂේත්රයේ රැකියා අවස්ථා විවෘත කරමින් ශ්රී ලංකා විදේශ සේවා නියුක්ති කාර්යාංශය (SLBFE) සහ රුසියාවේ ජාතික ඉදිකිරීම්කරුවන්ගේ සංගමය (NOSTROY) අතර සුවිශේෂී අවබෝධතා ගිවිසුමක් (MoU) අත්සන් කර තිබේ.
දශක ගණනාවක් තිස්සේ මැදපෙරදිග කලාපයට සීමා වී තිබූ ශ්රී ලංකා ඉදිකිරීම් ශ්රමිකයන්ගේ වෙළඳපොළ, නව විදේශ රැකියා ප්රතිපත්තිය යටතේ යුරෝපීය කලාපය දක්වා ව්යාප්ත වීමේ වැදගත් සන්ධිස්ථානයක් ලෙස මෙම ගිවිසුම සැලකේ. ශ්රී ලංකා විදේශ රැකියා නියෝජිත සමාගමේ සභාපති ආනන්ද ලාල් හෙට්ටිආරච්චි මහතා සහ NOSTROY සංවිධානයේ සභාපති ඇන්ටන් නිකොලයෙවිච් ග්ලූෂ්කොව් මහතා අතර මෙම ගිවිසුමට අත්සන් තැබිණි.
මොකක්ද මේ NOSTROY සංගමය?
රුසියාවේ විශාලතම ඉදිකිරීම් සංගම්වලින් එකක් වන NOSTROY, නිවාස, සිවිල් සහ කාර්මික ඉදිකිරීම් ක්ෂේත්රයේ නිරත සමාගම් 105කට අධික සංඛ්යාවක් නියෝජනය කරයි. මෙම ගිවිසුමට පෙර ඔවුන් ඉන්දියාව සමඟ ද මෙවැනිම ක්රමවේදයකට එළඹී ඇත.
ගිවිසුම අත්සන් කිරීමට පෙර පැවති විශේෂ සාකච්ඡාවකදී, විදේශ සේවා නියුක්ති කාර්යාංශයේ සභාපති කෝශල වික්රමසිංහ මහතා රුසියානු නියෝජිත පිරිසට පැහැදිලි කළේ, මෙරට තාක්ෂණික හා වෘත්තීය අධ්යාපන (TVET) ආයතන හරහා පුහුණුව ලබන ශ්රී ලාංකික නිපුණ සහ අර්ධ නිපුණ ශ්රමිකයන්ගේ උසස් ප්රමිතිය සහ ජාත්යන්තර ශ්රම වෙළඳපොළ තුළ ඔවුන් ලබා ඇති සාර්ථක අත්දැකීම් පිළිබඳවයි.
ඉදිරි අවස්ථා
NOSTROY සභාපති ඇන්ටන් ග්ලූෂ්කොව් මහතා සඳහන් කළේ, රුසියාවේ දැනට පවතින විශාල ශ්රම අවශ්යතාවය සපුරා ගැනීම සඳහා ඉදිරියේදී ශ්රී ලාංකිකයන් බඳවා ගැනීමට කටයුතු කරන බවයි. මෙම ගිවිසුම හරහා දෙරට අතර ශක්තිමත් සහයෝගීතා රාමුවක් ස්ථාපිත වන අතර, එය ශ්රී ලංකාවට නව විදේශ විනිමය මාර්ගයක් විවෘත කිරීමට හේතු වනු ඇත.
📢 Breaking News SMS Alerts
මොබිටෙල් පාවිච්චි කරන අයට විශ්වාසදායක පුවත් SMS සේවාව.
77000 ට SMS කරන්න
0 Comments