ජනපතිගෙන් ඓතිහාසික තීරණයක්: විදෙස්ගත ශ්රමිකයන්ගේ ආයෝජන සඳහා යටිතල පහසුකම් සහිත රජයේ ඉඩම් ලබාදීමට නියෝග
විදෙස් රැකියා අවසන් කර නැවත මෙරටට පැමිණෙන ශ්රමිකයන්ගේ ආයෝජන සහ ව්යවසායකත්ව අවස්ථා පුළුල් කිරීම සඳහා, අවශ්ය යටිතල පහසුකම් සහ සේවා සමඟ ඌණ උපයෝජිත රජයේ ඉඩම් ලබා දීමේ වැඩපිළිවෙළක් සකස් කරන ලෙස ජනාධිපති අනුර කුමාර දිසානායක මහතා නිලධාරීන්ට උපදෙස් දී තිබේ.
වැවිලි සහ ප්රජා යටිතල පහසුකම් අමාත්යාංශයේ 2026 අයවැය ප්රතිපාදන ප්රගතිය සමාලෝචනය කිරීම සහ 2027 අයවැය යෝජනා සාකච්ඡා කිරීම සඳහා ජනාධිපති කාර්යාලයේදී පැවති විශේෂ රැස්වීමකදී ජනාධිපතිවරයා මෙම වැදගත් නියෝගය නිකුත් කළේය. වැවිලි සහ ප්රජා යටිතල පහසුකම් අමාත්ය සමන්ත විද්යාරත්න මහතා ඇතුළු ඉහළ පෙළේ රාජ්ය නිලධාරීන් පිරිසක් මෙම අවස්ථාවට එක්ව සිටියහ.
මොකක්ද ජනපතිගේ නියෝගය?
විදෙස්ගත ශ්රමිකයන් මෙරටට යවන විශාල ප්රේෂණ (Remittances) ප්රමාණයක් තිබියදීත්, ඔවුන් ආපසු පැමිණීමෙන් පසු බොහෝ දෙනෙකුට තම උපයාගත් මුදල් ආයෝජනය කිරීමට සුදුසු වේදිකාවක් හෝ මඟ පෙන්වීමක් නොමැතිකම දිගු කලක් තිස්සේ පැවති ගැටලුවකි.
මෙම තත්ත්වය විසඳීම සඳහා, තම සේවා කාලය අවසන් කර මෙරටට පැමිණෙන ශ්රමිකයන්ගේ ආර්ථික හා සමාජීය නැඟීම වෙනුවෙන් ජනාධිපතිවරයා නව ප්රතිපත්තිමය තීරණයක් ගෙන ඇත. ඒ අනුව, ඌණ උපයෝජිත (සම්පූර්ණයෙන් භාවිත නොවන) රජයේ ඉඩම්, ඒවායේ ආයෝජන සඳහා අවශ්ය මාර්ග, ජලය, විදුලිය වැනි මූලික යටිතල පහසුකම් සහ සේවා සමඟ ලබා දීමට නියමිතය.
වැවිලි ක්ෂේත්රයේ ප්රතිසංස්කරණ
ජනාධිපතිවරයාගේ ප්රධානත්වයෙන් පැවති මෙම සමාලෝචන රැස්වීමේදී වැවිලි ක්ෂේත්රය ශක්තිමත් කිරීම සඳහා වන ප්රතිසංස්කරණ කිහිපයක් කෙරෙහි ද විශේෂ අවධානය යොමු විය.
· ආයතන ඒකාබද්ධ කිරීම: වැවිලි ක්ෂේත්රයට අදාළ විවිධ රාජ්ය ආයතන ඒකාබද්ධ කිරීමේ කටයුතු කඩිනම් කිරීම.
· නීතිමය රාමුව: රාජ්ය ඉඩම් සම්බන්ධ ගිවිසුම් යාවත්කාලීන කිරීම සහ ඒ සඳහා ශක්තිමත් නීතිමය පදනමක් සකස් කිරීම.
ප්රගතිය සමාලෝචනය කළ ප්රධාන ව්යාපෘති
ජනාධිපතිවරයා විසින් ප්රගතිය සමාලෝචනය කරන ලද ප්රධාන ජාතික වැඩසටහන් අතර,
· මලෛගම් නිවාස 10,000 ව්යාපෘතිය: නියමිත කාලසීමාව තුළ අවසන් කිරීමේ අවශ්යතාව අවධාරණය කෙරිණි.
· වතු ඉඩම් වටමැනුම් වැඩසටහන
· පොල් වගා සංවර්ධන හා රෝග පාලන වැඩසටහන්
· කප්රුක අරමුදල සහ උතුරු පොල් ත්රිකෝණ ව්යාපෘතිය
· කුඩා තේ වතු නැවත වගා කිරීම සහ තේ ගම්මාන 500 වැඩසටහන
· රබර්, කජු, තල් හා කිතුල් සංවර්ධන වැඩසටහන්
දිට්වා ආපදාවෙන් පසු ප්රතිසංස්කරණ සහ අධ්යාපන ප්රතිසංස්කරණ
දිට්වා සුළි කුණාටුවෙන් හානියට පත් තේ, පොල් සහ රබර් වගාවන් නැවත ස්ථාපිත කිරීම පිළිබඳව ද මෙහිදී සාකච්ඡා කෙරුණු අතර, තේ ගම්මාන වැඩසටහන පුළුල් ග්රාමීය සංවර්ධන ව්යාපෘති සමඟ ඒකාබද්ධ කිරීමට ජනාධිපතිවරයා උපදෙස් දුන්නේය.
එමෙන්ම, රාජ්ය වැවිලි සමාගම් කිහිපයක් පසුගිය වසරට සාපේක්ෂව ලාභදායීත්වය ඉහළ නංවා ගැනීම ඇගයීමට ලක් විය. ජාතික වැවිලි කළමනාකරණ ආයතනයේ පාඨමාලා විශ්වවිද්යාල පද්ධතිය සමඟ ඒකාබද්ධ කිරීමේ හැකියාව සොයා බලන ලෙස ද ජනාධිපතිවරයා නියෝග කළේය.
📢 Breaking News SMS Alerts
මොබිටෙල් පාවිච්චි කරන අයට විශ්වාසදායක පුවත් SMS සේවාව.
77000 ට SMS කරන්න
0 Comments