සියලුම මගී බස් රථ කිලෝමීටර් 5,000න් පසු අනිවාර්ය පරීක්ෂාවකට: ජාතික මාර්ග ආරක්ෂක සභාවෙන් නව නීතියක්
මගී ප්රවාහන බස් රථ අනතුරු අවම කිරීමේ අරමුණින්, සෑම බස් රථයක්ම කිලෝමීටර් 5,000ක් ධාවනය කිරීමෙන් පසු එහි යාන්ත්රික තත්ත්ව පරීක්ෂාවක් අනිවාර්යයෙන්ම සිදු කළ යුතු බවට මාර්ග ආරක්ෂාව පිළිබඳ ජාතික සභාව නව රෙගුලාසියක් හඳුන්වා දී තිබේ.
මෙම නව නීතියට අදාළ ගැසට් නිවේදනය මේ වන විටත් නිකුත් කර ඇති බව එම සභාවේ සභාපති මංජුල කුලරත්න මහතා නිවේදනය කළේය. පසුගිය කාලය පුරාවට මෙරට සිදු වූ බස් රථ අනතුරුවලට ප්රධාන හේතු දෙකක් ලෙස රියදුරන්ගේ නොසැලකිලිමත්කම සහ වාහනවල පවතින තාක්ෂණික දෝෂ හඳුනාගෙන ඇති අතර, එම දෝෂ ඉවත් කිරීම මෙම නව නීතියේ මූලික අපේක්ෂාවයි.
මොකක්ද නව නීතිය?
නව රෙගුලාසියට අනුව, සියලුම මගී ප්රවාහන බස් රථ (පෞද්ගලික සහ SLTB) කිලෝමීටර් 5,000 ක සීමාවක් සම්පූර්ණ කළ පසු අනිවාර්යයෙන්ම වාහන පරීක්ෂාවකට ලක් කළ යුතුය.
මෙම පරීක්ෂාව සිදු කිරීම සඳහා සුදුසුකම් ලත් නිලධාරීන් බඳවා ගැනීමේ කටයුතු මේ වන විට ආරම්භ කර ඇති අතර, එම නිලධාරීන් පත් කිරීමෙන් අනතුරුව, ඉදිරි මාස තුනක් තුළ මෙම නීතිය බස් රථ සඳහා ක්රියාත්මක කිරීමට නියමිතය.
සියලුම වාහන සඳහා අදාළ වෙයි
සභාපතිවරයා වැඩිදුරටත් අවධාරණය කළේ, මෙම තත්ත්ව පරීක්ෂා කිරීමේ ක්රියාවලිය බස් රථවලට පමණක් සීමා නොවන බවයි. ඉදිරියේදී මෙම නීතිය සියලුම වර්ගයේ වාහන (ලොරි, වෑන්, ත්රීරෝද රථ ඇතුළුව) සඳහා ද අදියර වශයෙන් ක්රියාත්මක කිරීමට ජාතික සභාව සැලසුම් කර තිබේ.
අනතුරු අවම කිරීමේ අරමුණ
මාර්ග ආරක්ෂාව පිළිබඳ ජාතික සභාවේ සභාපති මංජුල කුලරත්න මහතා සඳහන් කරන්නේ, රියදුරු අධ්යාපනය සහ දඬුවම් ක්රමවේදයන් පමණක් ප්රමාණවත් නොවන බවයි.
"පසුගිය කාලසීමාව තුළ මෙරට සිදු වූ අනතුරුවලට ප්රධාන හේතුව රියදුරන්ගේ නොසැලකිලිමත්කම සහ වාහනවල ඇති දෝෂ බව අපි හඳුනා ගත්තා. බ්රේක් අක්රිය වීම, ටයර් පුපුරා යාම වැනි වළක්වා ගත හැකි යාන්ත්රික දෝෂ නිසා අහිංසක මගීන්ගේ ජීවිත අවදානමේ." යනුවෙන් ඔහු පෙන්වා දුන්නේය.
මෙම නව ක්රමවේදය මඟින් බස් රථ හිමියන්ට තම වාහන නිසි පරිදි නඩත්තු කිරීමට බල කෙරෙන අතර, අනතුරුදායක වාහන මාර්ගයෙන් ඉවත් කිරීමට හැකි වනු ඇත.
📢 Breaking News SMS Alerts
මොබිටෙල් පාවිච්චි කරන අයට විශ්වාසදායක පුවත් SMS සේවාව.
77000 ට SMS කරන්න
0 Comments